صباح الصبر ..
**************
صباح الصبر ..
العينين مزروعة ف الجمر
شي يحفر ب ظفارو
على طرف د الخبز
و شي سرق البلاد ..
ملاين هي خباها مور البحر..
قال حقة الصحرا هي ..
قال الاوراش كبيرة هي
قال حقة التنمية ..
ما فبالناش عصابة هي
فوقاش كان موازين قضية ..
هاذي الشفرة هي ..
عصابة جمعات خيرات البلاد ..
كوشات على تحويشت العمر
صباح الصبر
العينين مزروعة ف الجمر
اجي
اش الفرق بينا حنا
و بين هادوك لي ف القبر
منين تتعشا .. موحال تفطر
منين تمشي ..
موحال توصل ..
تقدر تحصل ..
غادي و حاضي ..
عصابة هادي ..
هادي بلاد الغدر
ياك الصابة كالوها
كل ما زرعنا حلامة
نتفوها
بين الله و بينهوم
اش الفرق
ياك هوما سيدنا قدر
اجي
ياك سمعتو ب تهريب البلاد
و داكشي د القصر
الامارة و التجارة
باطويات هي ..
شلا فيلات هي ..
ملايير هي
تسربات قبل طلوع الفجر
قبل الموذن ما يودن
و قبل ما الجزر العذرا
تخبي موال العفن
و سيادنا المومنين
ينوضو يبرحو صلاة الزمر
بلاد المخزن و الغاشي
بلاد الشيخات و التعارج
و تحراك الشواشي
يعاودو لينا خرايف التماسيح
و هادو الذياب
و الفيولة
دكو البلاد
حتى خرجات مصارنها
ريحة زمرها عطات
شكون يقد يهضر
شكون يقد يحرك عينيه
ف وجه الليل
شكون يقد يهز سيوفت الشفر
صباح الصبر
العينين مزروعة ف الجمر
شكون يقد يهضر
***سليمان الهواري / رضا ***