صباح الورد و الزهر

صباح الورد و الزهر ...
صباح الياسمين
من عينيك مسقي بالعطر ..
صباح عينيك
تعسلو حتى زراقو ..
غراقو وسط الاخضر ..
صباحك يا شمس النهار ..
هدات ل ليلي تاج القمر ..
كل ما الليل يكحال ..
بياض سرتك
تشعل نيراني حتى للفجر ..
البياض بياض ..
و الوقفة عودة تنثر الوتاد ..
تشربني منها كيف بغات ريق الخمر ..
الطول نخلة ..
الشفايف غمازة لسيع نحلة ..
لسانها ف صدري شهدات عسل يقطر ..
هزي خلخالك يا ام الياسمين ..
اجيني انا ..
توحشتك انا ..
اجي نطويو الارض .. نقطعو هاد البحر ..
طوقيني بيك ..
خشيني فيك ..
نسقيك مايا ..
كل ما نتي سقيتيني تنحنيحات الجمر ..
داخلت عليك بالعرق لي فاض ف صدري ..
وانا نزرع بين نهودك تيجان التمر ..
داخلت عليك بالتنهيدة منك ..
تاكل التنهيدة مني ..
تفيق ف عنقك تفاحة النحر ..
داخلت عليك بصبعان يديك بعشرة ..
واحد واحد ف فمي ..
يتلفو ف فمك الهدرة ..
يبردوني شتا و يسخنوني صيف ..
يتلفو فيا دقة الوتر ..
اجي يا لاللات العيالات ..
اجي يا مشموم النسا ..
كوني زماني ..
كوني ليا دنيتي ..
كوني شهدة العمر ..
****رضا الموسوي****